وہ دل میں آج بسا بس کے دل نواز ہوا

وہ دل میں آج بسا بس کے دل نواز ہوا

دل و دماغ میں پھر خوب ساز باز ہوا

وہ لیس تیر نظر سے کمان ابرو سے

نہتا عشق تھا پسپا بہ ہر محاذ ہوا

وہ کس کے پھبتیاں کہلا رہے ہیں خوش گفتار

میں لب کشا بھی ہوا تو زباں دراز ہوا

تمام عمر کئے جس کو رات دن سجدے

وہ میری لحد پہ بھی منکر نماز ہوا

شجر بلند رہا آندھیوں میں خم ہو کر

جو سب سے جھک کے ملا ہے وہ سرفراز ہوا

مدد کی جب بھی ضرورت مجھے ہوئی شاہدؔ

عجیب بات ہے ہر شخص حیلہ ساز ہوا