wo dil nahin raha wo mohabbat nahin rahi

vo dil nahīñ rahā vo mohabbat nahīñ rahī

ab zindagī se koī shikāyat nahīñ rahī

is baar koī zaḳhm bhī gahrā nahīñ lagā

mujh par sitamgaroñ ki ināyat nahīñ rahī

jaa.eñ kahāñ sameT ke apnī udāsiyāñ

kahte the ghar jise vo imārat nahīñ rahī

ik dam se un kī yaad ga.ī to nahīñ magar

ab fikr meñ vo pahle sī kasrat nahīñ rahī

aañsū hī poñchhtā yā mire zaḳhm chūmtā

itnī bhī ab ke yaar ko fursat nahīñ rahī

mahfil hai hasratoñ kī ḳhayāloñ kā hai hujūm

tanhā.ī meñ bhī ab koī ḳhalvat nahīñ rahī

shāyad mujhe bhī ab ke vo kuchh meherbāñ lagā

shāyad use bhī mujh se shikāyat nahīñ rahī

kahte haiñ ab ke deñge har ik baat kā javāb

mujh meñ hī jab savāl kī tāqat nahīñ rahī

marne ne mere sab ko farishta banā diyā

dushman ke bhī diloñ meñ kudūrat nahīñ rahī

pahle to lutf-e-shiddat-e-ġham kī ḳhushī rahī

phir yuuñ huā ke ġham meñ bhī shiddat nahīñ rahī

kahte ke jā ḳhudā kī amaañ meñ diyā tujhe

vaqt-e-judā.ī itnī bhī mohlat nahīñ rahī

wo dil nahin raha wo mohabbat nahin rahi

ab zindagi se koi shikayat nahin rahi

is bar koi zaKHm bhi gahra nahin laga

mujh par sitamgaron ki inayat nahin rahi

jaen kahan sameT ke apni udasiyan

kahte the ghar jise wo imarat nahin rahi

ek dam se un ki yaad gai to nahin magar

ab fikr mein wo pahle si kasrat nahin rahi

aansu hi ponchhta ya mere zaKHm chumta

itni bhi ab ke yar ko fursat nahin rahi

mahfil hai hasraton ki KHayalon ka hai hujum

tanhai mein bhi ab koi KHalwat nahin rahi

shayad mujhe bhi ab ke wo kuchh meherban laga

shayad use bhi mujh se shikayat nahin rahi

kahte hain ab ke denge har ek baat ka jawab

mujh mein hi jab sawal ki taqat nahin rahi

marne ne mere sab ko farishta bana diya

dushman ke bhi dilon mein kudurat nahin rahi

pahle to lutf-e-shiddat-e-gham ki KHushi rahi

phir yun hua ke gham mein bhi shiddat nahin rahi

kahte ke ja KHuda ki aman mein diya tujhe

waqt-e-judai itni bhi mohlat nahin rahi