wo dil nahin raha wo tabiat nahin rahi

vo dil nahīñ rahā vo tabī.at nahīñ rahī

shāyad ab un ko mujh se mohabbat nahīñ rahī

ghabrā rahā huuñ kyoñ ye ġham-e-nāravā se ab

kyā mujh meñ ġham ke sahne kī tāqat nahīñ rahī

tum kyā badal ga.e ki zamāna badal gayā

taskīn-e-dil kī ab koī sūrat nahīñ rahī

jiine ko jī rahe haiñ tumhāre baġhair bhī

is tarah jaise jiine kī hasrat nahīñ rahī

shāyad koī hasīn idhar se guzar gayā

vo dard-e-dil kī pahlī sī hālat nahīñ rahī

jaage ho raat mahfil-e-aġhyār meñ zarūr

āñkhoñ meñ ab vo kufr kī zulmat nahīñ rahī

jab kar diyā ḳhizāñ ne vo rañgīñ chaman tabāh

vo husn ab kahāñ vo malāhat nahīñ rahī

zāhid meñ hai na zohd na rindoñ meñ mai-kashī

phūloñ meñ husn ġhunchoñ meñ rañgat nahīñ rahī

haañ ai 'hayāt' ham ne zamāne ke dukh sahe

phir bhī hameñ kisī se shikāyat nahīñ rahī

wo dil nahin raha wo tabiat nahin rahi

shayad ab un ko mujh se mohabbat nahin rahi

ghabra raha hun kyon ye gham-e-narawa se ab

kya mujh mein gham ke sahne ki taqat nahin rahi

tum kya badal gae ki zamana badal gaya

taskin-e-dil ki ab koi surat nahin rahi

jine ko ji rahe hain tumhaare baghair bhi

is tarah jaise jine ki hasrat nahin rahi

shayad koi hasin idhar se guzar gaya

wo dard-e-dil ki pahli si haalat nahin rahi

jage ho raat mahfil-e-aghyar mein zarur

aankhon mein ab wo kufr ki zulmat nahin rahi

jab kar diya KHizan ne wo rangin chaman tabah

wo husn ab kahan wo malahat nahin rahi

zahid mein hai na zohd na rindon mein mai-kashi

phulon mein husn ghunchon mein rangat nahin rahi

han ai 'hayat' hum ne zamane ke dukh sahe

phir bhi hamein kisi se shikayat nahin rahi