wo dil samo le jo daman mein kaenat ka karb

vo dil samo le jo dāman meñ kā.enāt kā karb

uThā sakā na ḳhud apne tasavvurāt kā karb

nikalnā ḳhuld se aadam kā ban gayā kyā chiiz

ye zindagī hai ki hai ik vārdāt kā karb

añdhere Daste rahe sham' jhilmilātī rahī

kahīñ to kah na sakeñ zindagī kī raat kā karb

panāh ke liye ḳhvāboñ kī god DhūñDhtī hai

hayāt sah na sakī apne tajrabāt kā karb

baḌā 'ajīb hai ḳhud se ye mā'rka apnā

kahāñ har ek se uTThā shikast-e-zāt kā karb

hai intizār meñ ik inqalāb āḳhir ke

zamīñ liye hue kitne taġhayyurāt kā karb

ye jiit kam hai ki ġham raas aa gayā varna

ḳhushī ḳhushī koī jhelā hai apnī maat kā karb

simaT ke ban gayā hoñToñ pe nāla-e-saharī

tamām din kī aziyyat tamām raat kā karb

jigar-gudāz the 'hurmat' kuchh aur ġham bhī magar

miTā gayā hameñ auj-e-taḳhayyulāt kā karb

wo dil samo le jo daman mein kaenat ka karb

uTha saka na KHud apne tasawwuraat ka karb

nikalna KHuld se aadam ka ban gaya kya chiz

ye zindagi hai ki hai ek wardat ka karb

andhere Daste rahe sham' jhilmilati rahi

kahin to kah na saken zindagi ki raat ka karb

panah ke liye KHwabon ki god DhunDhti hai

hayat sah na saki apne tajrabaat ka karb

baDa 'ajib hai KHud se ye ma'rka apna

kahan har ek se uTTha shikast-e-zat ka karb

hai intizar mein ek inqalab aaKHir ke

zamin liye hue kitne taghayyuraat ka karb

ye jit kam hai ki gham ras aa gaya warna

KHushi KHushi koi jhela hai apni mat ka karb

simaT ke ban gaya honTon pe nala-e-sahari

tamam din ki aziyyat tamam raat ka karb

jigar-gudaz the 'hurmat' kuchh aur gham bhi magar

miTa gaya hamein auj-e-taKHayyulat ka karb