wo ek abr ka TukDa kahin baras bhi gaya

vo ek abr kā TukḌā kahīñ baras bhī gayā

hamārā peḌ magar dhuup meñ jhulas bhī gayā

isī liye to kahā thā ki hoshiyār raho

jo āstīn meñ paalā thā saañp Das bhī gayā

tumhārā baaġh se jaanā bhī ik qayāmat hai

guloñ se ḳhushbū ga.ī aur phaloñ se ras bhī gayā

shajar kī yaad rulātī hī thī magar ab to

jo āshiyāñ ke barābar thā vo qafas bhī gayā

lahū-luhān guloñ ko bahut kiyā jis ne

ga.ī bahār to vo tā.ir-e-havas bhī gayā

wo ek abr ka TukDa kahin baras bhi gaya

hamara peD magar dhup mein jhulas bhi gaya

isi liye to kaha tha ki hoshiyar raho

jo aastin mein pala tha sanp Das bhi gaya

tumhaara bagh se jaana bhi ek qayamat hai

gulon se KHushbu gai aur phalon se ras bhi gaya

shajar ki yaad rulati hi thi magar ab to

jo aashiyan ke barabar tha wo qafas bhi gaya

lahu-luhan gulon ko bahut kiya jis ne

gai bahaar to wo tair-e-hawas bhi gaya