wo ek KHwab jo dekha gaya tha ujlat mein

vo ek ḳhvāb jo dekhā gayā thā ujlat meñ

usī kā karb sameTā hai aaj fursat meñ

ye baat sach hai ki begār to nahīñ ye hayāt

ki ham ko zaḳhm-e-tamannā mile haiñ ujrat meñ

ziyāñ yahī hai ki kuchh aur sūjhtā hī nahīñ

bas ek dhyān meñ rahte haiñ log shohrat meñ

hunar kaho ki karāmat magar yahī hai ki ham

ḳhushī ko Dhaal bhī sakte haiñ ġham kī sūrat meñ

zamīn jiitī hai yā sarzamīn-e-dil us ne

savāl tishna rahā jashn-e-fat.h-o-nusrat meñ

wo ek KHwab jo dekha gaya tha ujlat mein

usi ka karb sameTa hai aaj fursat mein

ye baat sach hai ki begar to nahin ye hayat

ki hum ko zaKHm-e-tamanna mile hain ujrat mein

ziyan yahi hai ki kuchh aur sujhta hi nahin

bas ek dhyan mein rahte hain log shohrat mein

hunar kaho ki karamat magar yahi hai ki hum

KHushi ko Dhaal bhi sakte hain gham ki surat mein

zamin jiti hai ya sarzamin-e-dil us ne

sawal tishna raha jashn-e-fath-o-nusrat mein