وہ ایک لفظ جو کبھی اس نے کہا نہیں

وہ ایک لفظ جو کبھی اس نے کہا نہیں

میں نے تو سن لیا تھا پر اس نے سنا نہیں

اعجاز اس کی چشم کرم کا ہے دوستو

پہلے سا زخم دل کا مرے اب ہرا نہیں

اک ساعت حسیں نے مجھے آشنا کیا

میں تو غم حیات سے تھا آشنا نہیں

منظر وہ میری آنکھ میں باقی ہے خواب سا

کشتی بھنور میں قید ہے اور ناخدا نہیں

تا حد چشم سرد و سیہ پوش ہے فضا

شعلہ کوئی بھی خاک سے میری اٹھا نہیں

خوشبو رگوں میں تیر رہی ہے بہار کی

کوئی بھی نقش دل کی زمیں پر نیا نہیں

اک موج تند و تیز بہا لے گئی مجھے

ساحل پہ دور دور کوئی نقش پا نہیں