wo ek lafz jo kabhi usne kaha nahin

vo ek lafz jo kabhī us ne kahā nahīñ

maiñ ne to sun liyā thā par us ne sunā nahīñ

e.ajāz us kī chashm-e-karam kā hai dosto

pahle sā zaḳhm dil kā mire ab harā nahīñ

ik sā.at-e-hasīñ ne mujhe āshnā kiyā

maiñ to ġham-e-hayāt se thā āshnā nahīñ

manzar vo merī aañkh meñ baaqī hai ḳhvāb sā

kashtī bhañvar meñ qaid hai aur nāḳhudā nahīñ

tā-hadd-e-chashm sard-o-siyah-posh hai fazā

sho.ala koī bhī ḳhaak se merī uThā nahīñ

ḳhushbū ragoñ meñ tair rahī hai bahār kī

koī bhī naqsh dil kī zamīñ par nayā nahīñ

ik mauj-e-tund-o-tez bahā le ga.ī mujhe

sāhil pe duur duur koī naqsh-e-pā nahīñ

wo ek lafz jo kabhi us ne kaha nahin

main ne to sun liya tha par us ne suna nahin

eajaz us ki chashm-e-karam ka hai dosto

pahle sa zaKHm dil ka mere ab hara nahin

ek saat-e-hasin ne mujhe aashna kiya

main to gham-e-hayat se tha aashna nahin

manzar wo meri aankh mein baqi hai KHwab sa

kashti bhanwar mein qaid hai aur naKHuda nahin

ta-hadd-e-chashm sard-o-siyah-posh hai faza

shoala koi bhi KHak se meri uTha nahin

KHushbu ragon mein tair rahi hai bahaar ki

koi bhi naqsh dil ki zamin par naya nahin

ek mauj-e-tund-o-tez baha le gai mujhe

sahil pe dur dur koi naqsh-e-pa nahin