wo ek lamha jise jawedan kaha jae

vo ek lamha jise jāvedāñ kahā jaa.e

mile to hāsil-e-umr-e-ravāñ kahā jaa.e

unhīñ se ruuh ko farhat unhīñ se dil ko qarār

vo hādsāt jinheñ jāñ-sitāñ kahā jaa.e

isī meñ chand mohabbat ke din bhī shāmil haiñ

tamām umr ko kyoñ rā.egāñ kahā jaa.e

mire nasīb meñ likhe na jā sake tum se

vo chaar tinke jinheñ āshiyāñ kahā jaa.e

mire hujūm-e-tamannā kī āḳhirī manzil

bas ek marg jise nā-gahāñ kahā jaa.e

adā-e-tamkanat-e-husn kā taqāzā hai

har ik sitam pe unheñ mehrbāñ kahā jaa.e

har ek qatre meñ sau sau hikāyateñ hoñgī

hazār dīda-e-tar be-zabāñ kahā jaa.e

harīm-e-dil meñ kahīñ rah ga.ī ḳhalish ban kar

kisī kī yaad jise nīsh-e-jāñ kahā jaa.e

hamāre ashk hī jab 'nūr' rakh sake na bharam

phir aur kis ko bhalā rāzdāñ kahā jaa.e

wo ek lamha jise jawedan kaha jae

mile to hasil-e-umr-e-rawan kaha jae

unhin se ruh ko farhat unhin se dil ko qarar

wo hadsat jinhen jaan-sitan kaha jae

isi mein chand mohabbat ke din bhi shamil hain

tamam umr ko kyon raegan kaha jae

mere nasib mein likhe na ja sake tum se

wo chaar tinke jinhen aashiyan kaha jae

mere hujum-e-tamanna ki aaKHiri manzil

bas ek marg jise na-gahan kaha jae

ada-e-tamkanat-e-husn ka taqaza hai

har ek sitam pe unhen mehrban kaha jae

har ek qatre mein sau sau hikayaten hongi

hazar dida-e-tar be-zaban kaha jae

harim-e-dil mein kahin rah gai KHalish ban kar

kisi ki yaad jise nish-e-jaan kaha jae

hamare ashk hi jab 'nur' rakh sake na bharam

phir aur kis ko bhala raazdan kaha jae