wo ek pal jo guzara hai pasdari mein

vo ek pal jo guzārā hai pāsdārī meñ

sukūn detā rahā mujh ko be-qarārī meñ

vo merī ruuh meñ jab tak na bas gayā aa kar

sañbhal sakā na kabhī dil ye be-qarārī meñ

hinā.ī dast kī mojiz-numā.iyāñ mat pūchh

tamām umr guzārī hai sharmsārī meñ

havas hai gauhar-e-nāyāb kī agar tujh ko

to Duub jā kabhī shabnam kī tāb-kārī meñ

samā ga.e haiñ nazar meñ lahū lahū manzar

tujhe milegā bhī kyā ḳhaak ashk-bārī meñ

kisī ke dil ko bhalā khīñche kyā tirā naala

'asar' asar ho koī jab na āh-o-zārī meñ

wo ek pal jo guzara hai pasdari mein

sukun deta raha mujh ko be-qarari mein

wo meri ruh mein jab tak na bas gaya aa kar

sanbhal saka na kabhi dil ye be-qarari mein

hinai dast ki mojiz-numaiyan mat puchh

tamam umr guzari hai sharmsari mein

hawas hai gauhar-e-nayab ki agar tujh ko

to Dub ja kabhi shabnam ki tab-kari mein

sama gae hain nazar mein lahu lahu manzar

tujhe milega bhi kya KHak ashk-bari mein

kisi ke dil ko bhala khinche kya tera nala

'asar' asar ho koi jab na aah-o-zari mein