وہ ایک سنگ ہے جس کا طواف کرتے رہے

وہ ایک سنگ ہے جس کا طواف کرتے رہے

مگر یہ کام خرد کے خلاف کرتے رہے

کہ ہم نے دیکھ کے چادر کو پاؤں پھیلایا

گزر بسر بھی بقدر کفاف کرتے رہے

ہم اپنی ذات کو خاکی صفت بنانے میں

رخ حیات سے مٹی کو صاف کرتے رہے

جو اہل ظرف تھے پیوندگی کے قائل تھے

خسیس لوگ تو چھت میں شگاف کرتے رہے

پلوں میں گھونٹ گئے پختگی کے حامل سب

نئے جو رند تھے بس شین قاف کرتے رہے

تمام شب رہا جاری ورود شعر و سخن

چراغ دل کا بٹن آن آف کرتے رہے

ہماری ذات کو کر دے نہ متہم ثاقبؔ

خودی سے دور خطر کا غلاف کرتے رہے