wo ek shaKHs jo itna udas lagta hai

vo ek shaḳhs jo itnā udaas lagtā hai

na jaane kyoñ vo mire dil ke paas lagtā hai

chaman meñ rang fazāoñ ne jab se hai badlā

har ek chehre pe ḳhauf-o-hirās lagtā hai

yuuñ ġhaur-o-fikr ke dariyā maiñ pī chukā phir bhī

mirā vajūd kyoñ sadiyoñ kī pyaas lagtā hai

mirā rafīq bhī ab jā milā raqīboñ se

bahut zahīn hai mauqa.a-shanās lagtā hai

dhaḌakne dil jo lagā bekalī sī hai taarī

jigar ke kone meñ un kā nivās lagtā hai

ḳhabar hai garm ki mahfil meñ vo bhī ā.eñge

yaqīn kam hai ziyāda qayās lagtā hai

ho ruuh khokhlī tārīk ho zamīr agar

badan bhī dekhiye ḳhālī gilās lagtā hai

barahna kaun nahīñ hai yahāñ pe ai 'imrān'

agarche jism pe sab ke libās lagtā hai

wo ek shaKHs jo itna udas lagta hai

na jaane kyon wo mere dil ke pas lagta hai

chaman mein rang fazaon ne jab se hai badla

har ek chehre pe KHauf-o-hiras lagta hai

yun ghaur-o-fikr ke dariya main pi chuka phir bhi

mera wajud kyon sadiyon ki pyas lagta hai

mera rafiq bhi ab ja mila raqibon se

bahut zahin hai mauqa-shanas lagta hai

dhaDakne dil jo laga bekali si hai tari

jigar ke kone mein un ka niwas lagta hai

KHabar hai garm ki mahfil mein wo bhi aaenge

yaqin kam hai ziyaada qayas lagta hai

ho ruh khokhli tarik ho zamir agar

badan bhi dekhiye KHali gilas lagta hai

barahna kaun nahin hai yahan pe ai 'imran'

agarche jism pe sab ke libas lagta hai