wo ek shaKHs ki jo sath sath phirta tha

vo ek shaḳhs ki jo saath saath phirtā thā

nazar jo badlī to phir vo nazar nahīñ aayā

phirā kiye haiñ chahl saal dasht-e-vahshat meñ

kisī ko yaad tirā rahguzar nahīñ aayā

bahut jatāyā kisī ne ki saath saath thā vo

hameñ to yaad koī ham-safar nahīñ aayā

kahā thā shaam se pahle hī lauT aa.egā

hameñ ḳhayāl rahā raat bhar nahīñ aayā

thake hue the bahut baiTh jaate saa.e meñ

hamārī raah meñ koī shajar nahīñ aayā

ye rāh-e-koh-e-nidā hai qadam na apne baḌhā

vahāñ se lauT ke koī bashar nahīñ aayā

bahut hudūd-e-zamān-o-makāñ se duur ga.e

hameñ to raas kabhī bhī safar nahīñ aayā

nahīñ ki yaad patā us ko mere ghar kā na thā

tamām shahr meñ ghūmā idhar nahīñ aayā

misāl-e-sāya thā vo phir bhī duur duur rahā

hazār saal hue lauT kar nahīñ aayā

rahā raqīb se hujjat meñ 'qādrī' masrūf

magar vo le ke tumhārī ḳhabar nahīñ aayā

wo ek shaKHs ki jo sath sath phirta tha

nazar jo badli to phir wo nazar nahin aaya

phira kiye hain chahl sal dasht-e-wahshat mein

kisi ko yaad tera rahguzar nahin aaya

bahut jataya kisi ne ki sath sath tha wo

hamein to yaad koi ham-safar nahin aaya

kaha tha sham se pahle hi lauT aaega

hamein KHayal raha raat bhar nahin aaya

thake hue the bahut baiTh jate sae mein

hamari rah mein koi shajar nahin aaya

ye rah-e-koh-e-nida hai qadam na apne baDha

wahan se lauT ke koi bashar nahin aaya

bahut hudud-e-zaman-o-makan se dur gae

hamein to ras kabhi bhi safar nahin aaya

nahin ki yaad pata us ko mere ghar ka na tha

tamam shahr mein ghuma idhar nahin aaya

misal-e-saya tha wo phir bhi dur dur raha

hazar sal hue lauT kar nahin aaya

raha raqib se hujjat mein 'qadri' masruf

magar wo le ke tumhaari KHabar nahin aaya