wo faza kya jahan bahaar na ho

vo fazā kyā jahāñ bahār na ho

diid hote hī jāñ-nisār na ho

ek bhī gul nazar nahīñ aatā

jis pe maalī kā e'tibār na ho

aise piine kā fā.eda kyā hai

jis kā kuchh der tak ḳhumār na ho

'āshiqī meñ maza nahīñ rahtā

gar mohabbat meñ intizār na ho

vo faqat aañkh hai nigāh nahīñ

jo kisī dil ke ār-pār na ho

maiñ use sīñchtā nahīñ 'naurang'

jis gulistāñ pe iḳhtiyār na ho

wo faza kya jahan bahaar na ho

did hote hi jaan-nisar na ho

ek bhi gul nazar nahin aata

jis pe mali ka e'tibar na ho

aise pine ka faeda kya hai

jis ka kuchh der tak KHumar na ho

'ashiqi mein maza nahin rahta

gar mohabbat mein intizar na ho

wo faqat aankh hai nigah nahin

jo kisi dil ke aar-par na ho

main use sinchta nahin 'naurang'

jis gulistan pe iKHtiyar na ho