wo gham-gusar bil-aKHir bala-e-jaan nikla

vo ġham-gusār bil-āḳhir balā-e-jāñ niklā

jise zamīn samajhte the āsmāñ niklā

azīm-tar hai mohabbat meñ ruuh kā rishta

magar badan kā ta.alluq bhī darmiyāñ niklā

surāġh-e-qatl shahādat subūt sab gūñge

lahū ḳhamosh thā ḳhanjar bhī be-zabāñ niklā

tamām rāste maazī ke band the phir bhī

har ek moḌ se yādoñ kā kārvāñ niklā

sunī jo merī kahānī to ro paḌe sab log

sabhoñ ke dard meñ ik rishta-e-nihāñ niklā

ham apne ġham kā fasāna kahā kiye shab-bhar

huī jo sub.h to zikr-e-ġham-e-jahāñ niklā

'shahāb' jis kī ḳhitābat kā shor hai yaaro

ġhazal kī bazm meñ kam-saut-o-kam-bayāñ niklā

wo gham-gusar bil-aKHir bala-e-jaan nikla

jise zamin samajhte the aasman nikla

azim-tar hai mohabbat mein ruh ka rishta

magar badan ka talluq bhi darmiyan nikla

suragh-e-qatl shahadat subut sab gunge

lahu KHamosh tha KHanjar bhi be-zaban nikla

tamam raste mazi ke band the phir bhi

har ek moD se yaadon ka karwan nikla

suni jo meri kahani to ro paDe sab log

sabhon ke dard mein ek rishta-e-nihan nikla

hum apne gham ka fasana kaha kiye shab-bhar

hui jo subh to zikr-e-gham-e-jahan nikla

'shahab' jis ki KHitabat ka shor hai yaro

ghazal ki bazm mein kam-saut-o-kam-bayan nikla