wo gham jo mohabbat ke siwa kuchh bhi nahin hai

vo ġham jo mohabbat ke sivā kuchh bhī nahīñ hai

pur-kaif aziyyat ke sivā kuchh bhī nahīñ hai

insān kī me'rāj-e-taraqqī kī hikāyat

ḳhāliq kī 'ināyat ke sivā kuchh bhī nahīñ hai

sach pūchhiye in husn ke jalvoñ kī haqīqat

ādāb-e-mohabbat ke sivā kuchh bhī nahīñ hai

kyā kahiye ki me'yār-e-'urūj-e-dil-e-ādam

īmān-o-firāsat ke sivā kuchh bhī nahīñ hai

ye dabdaba-o-shaukat-o-tanzīm-o-siyāsat

ik ġhalba-o-quvvat ke sivā kuchh bhī nahīñ hai

ab ḳhidmat-e-aqvām ke parde meñ bhī aksar

tamkīn-e-siyāsat ke sivā kuchh bhī nahīñ hai

ye husn kī rangīnī-e-dilkash kā ta.assur

ehsās-e-tabī'at ke sivā kuchh bhī nahīñ hai

ye be-ḳhudī-o-hosh kā me'yār-e-tavāzun

saaqī kī karāmat ke sivā kuchh bhī nahīñ hai

ye jalva-gah-e-gulshan-e-ījād kā 'ālam

ik amr-e-mashiyyat ke sivā kuchh bhī nahīñ hai

is daur ke rangīn ma'ānī meñ bhī aksar

alfāz kī nudrat ke sivā kuchh bhī nahīñ hai

'in'ām' ġham-e-'ishq kā tūfān-e-balā-ḳhez

ehsās kī shiddat ke sivā kuchh bhī nahīñ hai

wo gham jo mohabbat ke siwa kuchh bhi nahin hai

pur-kaif aziyyat ke siwa kuchh bhi nahin hai

insan ki me'raj-e-taraqqi ki hikayat

KHaliq ki 'inayat ke siwa kuchh bhi nahin hai

sach puchhiye in husn ke jalwon ki haqiqat

aadab-e-mohabbat ke siwa kuchh bhi nahin hai

kya kahiye ki me'yar-e-'uruj-e-dil-e-adam

iman-o-firasat ke siwa kuchh bhi nahin hai

ye dabdaba-o-shaukat-o-tanzim-o-siyasat

ek ghalba-o-quwwat ke siwa kuchh bhi nahin hai

ab KHidmat-e-aqwam ke parde mein bhi aksar

tamkin-e-siyasat ke siwa kuchh bhi nahin hai

ye husn ki rangini-e-dilkash ka tassur

ehsas-e-tabi'at ke siwa kuchh bhi nahin hai

ye be-KHudi-o-hosh ka me'yar-e-tawazun

saqi ki karamat ke siwa kuchh bhi nahin hai

ye jalwa-gah-e-gulshan-e-ijad ka 'alam

ek amr-e-mashiyyat ke siwa kuchh bhi nahin hai

is daur ke rangin ma'ani mein bhi aksar

alfaz ki nudrat ke siwa kuchh bhi nahin hai

'in'am' gham-e-'ishq ka tufan-e-bala-KHez

ehsas ki shiddat ke siwa kuchh bhi nahin hai