wo gum hue hain musafir rah-e-tamanna mein

vo gum hue haiñ musāfir rah-e-tamannā meñ

ki gard bhī nahīñ ab aarzū ke sahrā meñ

hai kaun jalva-sarā bām-e-āfrīnash par

utar ga.e haiñ sitāre se chashm-e-bīnā meñ

milī thī jis ko numū dard kī salīboñ se

vo lams bhī nahīñ baaqī mire masīhā meñ

kashīd jin se huī thī na.e zamānoñ kī

vo mai-kade bhī hue ġharq mauj-e-sahbā meñ

uThā liyā thā jinheñ ġham ne shahr-e-mātam se

vo harf likkhe ga.e haiñ ḳhat-e-shakebā meñ

diyā shu.ūr ujāloñ kā sub.h-e-mariyam ko

charāġh kis ne jalāyā shab-e-kalīsā meñ

uThā hai ab ke vo tūfāñ javār-e-sāhil se

ki mauj bhī nahīñ mahfūz qa.ar-e-dariyā meñ

jo le ga.iiñ mire yūsuf ko bāb-e-zindāñ tak

vo chāhateñ bhī nahīñ dāman-e-zuleḳhā meñ

vo zaḳhm jin se milā dard āshnā.ī kā

nahīñ haiñ vo bhī 'samad' ab mire sarāpā meñ

wo gum hue hain musafir rah-e-tamanna mein

ki gard bhi nahin ab aarzu ke sahra mein

hai kaun jalwa-sara baam-e-afrinash par

utar gae hain sitare se chashm-e-bina mein

mili thi jis ko numu dard ki salibon se

wo lams bhi nahin baqi mere masiha mein

kashid jin se hui thi nae zamanon ki

wo mai-kade bhi hue gharq mauj-e-sahba mein

uTha liya tha jinhen gham ne shahr-e-matam se

wo harf likkhe gae hain KHat-e-shakeba mein

diya shuur ujalon ka subh-e-mariyam ko

charagh kis ne jalaya shab-e-kalisa mein

uTha hai ab ke wo tufan jawar-e-sahil se

ki mauj bhi nahin mahfuz qar-e-dariya mein

jo le gain mere yusuf ko bab-e-zindan tak

wo chahaten bhi nahin daman-e-zuleKHa mein

wo zaKHm jin se mila dard aashnai ka

nahin hain wo bhi 'samad' ab mere sarapa mein