وہ حادثہ بھی ہوا میری زندگانی میں

وہ حادثہ بھی ہوا میری زندگانی میں

جسے پڑھا تھا بڑے شوق سے کہانی میں

دکھائی جب بھی دیا چاند بہتے پانی میں

لگا کہ حسن ترا آ گیا روانی میں

اسے خبر ہی نہیں شام کو جو ہونا ہے

یہ آفتاب ابھی چور ہے جوانی میں

یوں ہی سنورتی نہیں ہیں گلوں کی تقدیریں

لہو نچوڑنا پڑتا ہے باغبانی میں

تمام عمر میں اس کو تلاش کرتا رہا

وہ ایک شخص جو تھا ہی نہیں کہانی میں

کبھی کسی کے نہ مہمان ہم ہوئے انعامؔ

تمام عمر گزاری ہے میزبانی میں