wo had se dur hote ja rahe hain

vo had se duur hote jā rahe haiñ

baḌe maġhrūr hote jā rahe haiñ

base haiñ jab se vo merī nazar meñ

sarāpā nuur hote jā rahe haiñ

jo phūTe aable dil kī ḳhalish se

vo ab nāsūr hote jā rahe haiñ

bahut mushkil hai manzil tak rasā.ī

vo kosoñ duur hote jā rahe haiñ

kahāñ pahlī sī rāh-o-rasm-e-ulfat

na.e dastūr hote jā rahe haiñ

hamāre dāġh-e-dil rāh-e-talab meñ

charāġh-e-tūr hote jā rahe haiñ

ḳhudā-hāfiz hai ab bāda-kashoñ kā

nashe meñ chuur hote jā rahe haiñ

pilā de sāqiyā bāda-kashoñ ko

nashe kāfūr hote jā rahe haiñ

qarīb-e-dil vo kyā ai 'nāz' aa.e

nazar se duur hote jā rahe haiñ

wo had se dur hote ja rahe hain

baDe maghrur hote ja rahe hain

base hain jab se wo meri nazar mein

sarapa nur hote ja rahe hain

jo phuTe aable dil ki KHalish se

wo ab nasur hote ja rahe hain

bahut mushkil hai manzil tak rasai

wo koson dur hote ja rahe hain

kahan pahli si rah-o-rasm-e-ulfat

nae dastur hote ja rahe hain

hamare dagh-e-dil rah-e-talab mein

charagh-e-tur hote ja rahe hain

KHuda-hafiz hai ab baada-kashon ka

nashe mein chur hote ja rahe hain

pila de saqiya baada-kashon ko

nashe kafur hote ja rahe hain

qarib-e-dil wo kya ai 'naz' aae

nazar se dur hote ja rahe hain