wo hai apna ye jatana bhi nahin chahte hum

vo hai apnā ye jatānā bhī nahīñ chāhte ham

dil ko ab aur dukhānā bhī nahīñ chāhte ham

aarzū hai ki vo har baat ko ḳhud hī samjhe

dil meñ kyā kyā hai dikhānā bhī nahīñ chāhte ham

ek parde ne banā rakkhā hai donoñ kā bharam

aur vo parda haTānā bhī nahīñ chāhte ham

tohmateñ ham pe lagī rahtī haiñ lekin phir bhī

āsmāñ sar pe girānā bhī nahīñ chāhte ham

ḳhud-numā.ī hameñ manzūr nahīñ hai hargiz

aise qad apnā baḌhānā bhī nahīñ chāhte ham

das se milnā hai use ek haiñ un meñ ham bhī

is tarah us ko bulānā bhī nahīñ chāhte ham

ham se milne kī taḌap jab nahīñ us ko 'mīnā'

haath phir us se milānā bhī nahīñ chāhte ham

wo hai apna ye jatana bhi nahin chahte hum

dil ko ab aur dukhana bhi nahin chahte hum

aarzu hai ki wo har baat ko KHud hi samjhe

dil mein kya kya hai dikhana bhi nahin chahte hum

ek parde ne bana rakkha hai donon ka bharam

aur wo parda haTana bhi nahin chahte hum

tohmaten hum pe lagi rahti hain lekin phir bhi

aasman sar pe girana bhi nahin chahte hum

KHud-numai hamein manzur nahin hai hargiz

aise qad apna baDhana bhi nahin chahte hum

das se milna hai use ek hain un mein hum bhi

is tarah us ko bulana bhi nahin chahte hum

hum se milne ki taDap jab nahin us ko 'mina'

hath phir us se milana bhi nahin chahte hum