wo hain aaj baala-e-baam allah allah

vo haiñ aaj bālā-e-bām allāh allāh

mai-e-ishq kā le ke jaam allāh allāh

mujhe kar diyā ḳhud se be-ḳhud unhoñne

nigāhoñ se de kar payām allāh allāh

ye mere liye muzda-e-jāñ-fizā hai

mileñge vo ab sub.h-o-shām allāh allāh

na hogā tumheñ tishna-kāmī kā shikva

vo de kar ga.e ye payām allāh allāh

raheñ apne va.ade pe sābit-qadam vo

rahe un kā lutf-e-davām allāh allāh

jo sunte na the merī arz-e-tamannā

vo lete haiñ ab merā naam allāh allāh

mire ḳhāna-e-dil meñ haiñ jalva-farmā

jo haiñ misl-e-māh-e-tamām allāh allāh

thā ab tak giraftār zulfoñ meñ jin kī

vo haiñ ab mire zer-e-dām allāh allāh

kahāñ maiñ kahāñ un kī 'barqī'-navāzī

vo karte haiñ mujh ko salām allāh allāh

wo hain aaj baala-e-baam allah allah

mai-e-ishq ka le ke jam allah allah

mujhe kar diya KHud se be-KHud unhonne

nigahon se de kar payam allah allah

ye mere liye muzda-e-jaan-fiza hai

milenge wo ab subh-o-sham allah allah

na hoga tumhein tishna-kaami ka shikwa

wo de kar gae ye payam allah allah

rahen apne wade pe sabit-qadam wo

rahe un ka lutf-e-dawam allah allah

jo sunte na the meri arz-e-tamanna

wo lete hain ab mera nam allah allah

mere KHana-e-dil mein hain jalwa-farma

jo hain misl-e-mah-e-tamam allah allah

tha ab tak giraftar zulfon mein jin ki

wo hain ab mere zer-e-dam allah allah

kahan main kahan un ki 'barqi'-nawazi

wo karte hain mujh ko salam allah allah