wo humse ho gaya hai be-KHabar kuchh

vo ham se ho gayā hai be-ḳhabar kuchh

badalte mausamoñ kā hai asar kuchh

kahīñ saa.e meñ ruk kar kyā kareñge

chalo ab tez baaqī hai safar kuchh

havā-e-tund kā ye kaam dekho

na chhoḌā shāḳh par baaqī samar kuchh

bhaTakte phir rahe haiñ rāstoñ meñ

basārat se tahī ahl-e-nazar kuchh

agarche shahr to apnā hai lekin

parā.e se haiñ kyuuñ dīvār-o-dar kuchh

abhī dil meñ uḌānoñ kī hai ḳhvāhish

salāmat haiñ hamāre bāl-o-par kuchh

abhī 'shāhid' luTāo ġham kī daulat

abhī haiñ aañkh meñ la.al-o-gohar kuchh

wo hum se ho gaya hai be-KHabar kuchh

badalte mausamon ka hai asar kuchh

kahin sae mein ruk kar kya karenge

chalo ab tez baqi hai safar kuchh

hawa-e-tund ka ye kaam dekho

na chhoDa shaKH par baqi samar kuchh

bhaTakte phir rahe hain raston mein

basarat se tahi ahl-e-nazar kuchh

agarche shahr to apna hai lekin

parae se hain kyun diwar-o-dar kuchh

abhi dil mein uDanon ki hai KHwahish

salamat hain hamare baal-o-par kuchh

abhi 'shahid' luTao gham ki daulat

abhi hain aankh mein lal-o-gohar kuchh