wo humse milne ke liye aae nahin kabhi

vo ham se milne ke liye aa.e nahīñ kabhī

ham ne bhī raag 'ishq kī chheḌe nahīñ kabhī

tum kah rahe ho is liye hañste haiñ varna to

ham jitne dil malūl haiñ hañste nahīñ kabhī

ham ko zamāna chhoḌ gayā lahroñ meñ magar

lahroñ ko ham-safar kiyā Duube nahīñ kabhī

vo regzār kar gayā sarsabz baaġh par

sab peḌ bā-samar rahe sūkhe nahīñ kabhī

vo sañg-e-be-vafā.ī chalātā rahā sadā

lekin vafā ke aa.ine TuuTe nahīñ kabhī

'faisal' chalo usī jagah chalte haiñ ham jahāñ

us be-vafā kā saaya bhī guzre nahīñ kabhī

wo hum se milne ke liye aae nahin kabhi

hum ne bhi rag 'ishq ki chheDe nahin kabhi

tum kah rahe ho is liye hanste hain warna to

hum jitne dil malul hain hanste nahin kabhi

hum ko zamana chhoD gaya lahron mein magar

lahron ko ham-safar kiya Dube nahin kabhi

wo regzar kar gaya sarsabz bagh par

sab peD ba-samar rahe sukhe nahin kabhi

wo sang-e-be-wafai chalata raha sada

lekin wafa ke aaine TuTe nahin kabhi

'faisal' chalo usi jagah chalte hain hum jahan

us be-wafa ka saya bhi guzre nahin kabhi