wo hamari samt apna ruKH badalta kyun nahin

vo hamārī samt apnā ruḳh badaltā kyuuñ nahīñ

raat to guzrī magar sūraj nikaltā kyuuñ nahīñ

Thiik uThte haiñ qadam bhī raah bhī hamvār hai

bojh apnī zindagī kā phir sañbhaltā kyuuñ nahīñ

jis tarah vo chāhtā hai Dhaal letā hai hameñ

vo hamāre dil ke paimāne meñ Dhaltā kyuuñ nahīñ

kyā mohabbat meñ kabhī hotī hai aisī kaifiyat

vo qarīb-e-jāñ hai lekin dil bahaltā kyuuñ nahīñ

aadmī ke dil kā jauhar yuuñ to īmāñ hai magar

āj-kal bāzār meñ sikka ye chaltā kyuuñ nahīñ

jaane kaisī haiñ ye zanjīreñ hamāre paañv meñ

garmī-e-raftār se lohā pighaltā kyuuñ nahīñ

is ma.āl-e-shauq par sab haath malte haiñ magar

tū kabhī 'afsar' kaf-e-afsos maltā kyuuñ nahīñ

wo hamari samt apna ruKH badalta kyun nahin

raat to guzri magar suraj nikalta kyun nahin

Thik uThte hain qadam bhi rah bhi hamwar hai

bojh apni zindagi ka phir sanbhalta kyun nahin

jis tarah wo chahta hai Dhaal leta hai hamein

wo hamare dil ke paimane mein Dhalta kyun nahin

kya mohabbat mein kabhi hoti hai aisi kaifiyat

wo qarib-e-jaan hai lekin dil bahalta kyun nahin

aadmi ke dil ka jauhar yun to iman hai magar

aaj-kal bazar mein sikka ye chalta kyun nahin

jaane kaisi hain ye zanjiren hamare panw mein

garmi-e-raftar se loha pighalta kyun nahin

is maal-e-shauq par sab hath malte hain magar

tu kabhi 'afsar' kaf-e-afsos malta kyun nahin