wo har har qadam par sambhalte hue

vo har har qadam par sambhalte hue

diloñ ko masalte haiñ chalte hue

na armāñ ko dekhā nikalte hue

na naḳhl-e-tamannā ko phalte hue

vo kis tarah qaabū meñ aa.eñ mire

qayāmat ke putle haiñ chalte hue

rahī ek andāz par chashm-e-yār

zamāne ko dekhā badalte hue

vo kuchh rañg lā.eñge roz-e-visāl

hinā un ko dekhā hai malte hue

dam-e-naz.a yārab maiñ dekhūñ unheñ

vo dekheñ mirā dam nikalte hue

unheñ ġhair se jab na fursat milī

chale aa.e ham haath malte hue

maiñ jānūñ ki naale meñ hai kuchh asar

jo dil un kā dekhūñ pighalte hue

vo nikle udhar se to ai 'barq' yuuñ

mirā dil kaf-e-pā se malte hue

wo har har qadam par sambhalte hue

dilon ko masalte hain chalte hue

na arman ko dekha nikalte hue

na naKHl-e-tamanna ko phalte hue

wo kis tarah qabu mein aaen mere

qayamat ke putle hain chalte hue

rahi ek andaz par chashm-e-yar

zamane ko dekha badalte hue

wo kuchh rang laenge roz-e-visal

hina un ko dekha hai malte hue

dam-e-naza yarab main dekhun unhen

wo dekhen mera dam nikalte hue

unhen ghair se jab na fursat mili

chale aae hum hath malte hue

main jaanun ki nale mein hai kuchh asar

jo dil un ka dekhun pighalte hue

wo nikle udhar se to ai 'barq' yun

mera dil kaf-e-pa se malte hue