وہ ہر قدم مرے ہم راہ رہ گزر میں رہے

وہ ہر قدم مرے ہم راہ رہ گزر میں رہے

مرا ہی ذوق سفر میرے ہم سفر میں رہے

دیا گیا ہے انہیں کو بہادری کا نشان

بوقت جنگ جو چپ چاپ اپنے گھر میں رہے

تمہارے پیار کا میں بھی ہوں معترف اے دوست

تمہارا درد بھی کچھ میرے درد سر میں رہے

انہیں تو کچھ نہ ملا جو کھڑے تھے ساحل پر

جو تہہ میں اترے وہی حلقۂ گہر میں رہے

خدا کرے کہ دم صبح جب بھی آنکھ کھلے

تمہارا پھول سا چہرہ مری نظر میں رہے

یہ بات سچ ہے کہ اکثر غریب کے بچے

امیر بچوں سے اچھے کلاس بھر میں رہے

اسی سے ہوتی ہے پیدا کلام میں تاثیر

قلم اٹھاؤ تو ماحول بھی نظر میں رہے

یہی ہے آرزو ناظرؔ کہ شاعری کے طفیل

ہماری عزت و تکریم ہر بشر میں رہے