wo hasb-e-wada na aaya to aankh bhar aai

vo hasb-e-va.ada na aayā to aañkh bhar aa.ī

mujhe tamāshā banāyā to aañkh bhar aa.ī

sajā ke rakhtā thā palkoñ pe jis ko maiñ aksar

nazar se us ne girāyā to aañkh bhar aa.ī

hamesha kartā thā merī jo nāz-bardārī

isī kā naaz uThāyā to aañkh bhar aa.ī

jise samajhtā thā maiñ dil-navāz jab us se

sukūn-e-qalb na paayā to aañkh bhar aa.ī

vo mujh se bhartā thā dum dostī kā lekin jab

adū se haath milāyā to aañkh bhar aa.ī

na thā ye vahm-o-gumāñ mujh ko vo bulā.egā

achānak us ne bulāyā to aañkh bhar aa.ī

nahīñ hai shikva koī dushmanoñ se ai 'barqī'

fareb dost se khāyā to aañkh bhar aa.ī

wo hasb-e-wada na aaya to aankh bhar aai

mujhe tamasha banaya to aankh bhar aai

saja ke rakhta tha palkon pe jis ko main aksar

nazar se us ne giraya to aankh bhar aai

hamesha karta tha meri jo naz-bardari

isi ka naz uThaya to aankh bhar aai

jise samajhta tha main dil-nawaz jab us se

sukun-e-qalb na paya to aankh bhar aai

wo mujh se bharta tha dum dosti ka lekin jab

adu se hath milaya to aankh bhar aai

na tha ye wahm-o-guman mujh ko wo bulaega

achanak us ne bulaya to aankh bhar aai

nahin hai shikwa koi dushmanon se ai 'barqi'

fareb dost se khaya to aankh bhar aai