wo hawa na rahi wo chaman na raha wo gali na rahi wo hasin na rahe

vo havā na rahī vo chaman na rahā vo galī na rahī vo hasīñ na rahe

vo falak na rahā vo samāñ na rahā vo makāñ na rahe vo makīñ na rahe

vo guloñ meñ guloñ kī sī bū na rahī vo azīzoñ meñ lutf kī ḳhū na rahī

vo hasīnoñ meñ rañg-e-vafā na rahā kaheñ aur kī kyā vo hamīñ na rahe

na vo aan rahī na umañg rahī na vo rindī o zohd kī jañg rahī

sū-e-qibla nigāhoñ ke ruḳh na rahe aur dar pe naqsh-e-jabīñ na rahe

na vo jaam rahe na vo mast rahe na fidā.i-e-ahd-e-alast rahe

vo tarīqa-e-kār-e-jahāñ na rahā vo mashāġhil-e-raunaq-e-dīñ na rahe

hameñ laakh zamāna lubhā.e to kyā na.e rañg jo charḳh dikhā.e to kyā

ye muhāl hai ahl-e-vafā ke liye ġham-e-millat o ulfat-e-dīñ na rahe

tire kūcha-e-zulf meñ dil hai mirā ab use maiñ samajhtā huuñ dām-e-balā

ye ajiib sitam hai ajiib jafā ki yahāñ na rahe to kahīñ na rahe

ye tumhāre hī dam se hai bazm-e-tarab abhī jaao na tum na karo ye ġhazab

koī baiTh ke lutf uThā.egā kyā ki jo raunaq-e-bazm tumhīñ na rahe

jo thiiñ chashm-e-falak kī bhī nūr-e-nazar vahī jin pe nisār the shams o qamar

so ab aisī miTī haiñ vo anjuman.en ki nishān bhī un ke kahīñ na rahe

vahī sūrateñ rah ga.iiñ pesh-e-nazar jo zamāne ko phereñ idhar se udhar

magar aise jamāl-e-jahāñ-ārā jo the raunaq-e-rū-e-zamīñ na rahe

ġham o rañj meñ 'akbar' agar hai ghirā to samajh le ki rañj ko bhī hai fanā

kisī shai ko nahīñ hai jahāñ meñ baqā vo ziyāda malūl o hazīñ na rahe

wo hawa na rahi wo chaman na raha wo gali na rahi wo hasin na rahe

wo falak na raha wo saman na raha wo makan na rahe wo makin na rahe

wo gulon mein gulon ki si bu na rahi wo azizon mein lutf ki KHu na rahi

wo hasinon mein rang-e-wafa na raha kahen aur ki kya wo hamin na rahe

na wo aan rahi na umang rahi na wo rindi o zohd ki jang rahi

su-e-qibla nigahon ke ruKH na rahe aur dar pe naqsh-e-jabin na rahe

na wo jam rahe na wo mast rahe na fidai-e-ahd-e-alast rahe

wo tariqa-e-kar-e-jahan na raha wo mashaghil-e-raunaq-e-din na rahe

hamein lakh zamana lubhae to kya nae rang jo charKH dikhae to kya

ye muhaal hai ahl-e-wafa ke liye gham-e-millat o ulfat-e-din na rahe

tere kucha-e-zulf mein dil hai mera ab use main samajhta hun dam-e-bala

ye ajib sitam hai ajib jafa ki yahan na rahe to kahin na rahe

ye tumhaare hi dam se hai bazm-e-tarab abhi jao na tum na karo ye ghazab

koi baiTh ke lutf uThaega kya ki jo raunaq-e-bazm tumhin na rahe

jo thin chashm-e-falak ki bhi nur-e-nazar wahi jin pe nisar the shams o qamar

so ab aisi miTi hain wo anjumanen ki nishan bhi un ke kahin na rahe

wahi suraten rah gain pesh-e-nazar jo zamane ko pheren idhar se udhar

magar aise jamal-e-jahan-ara jo the raunaq-e-ru-e-zamin na rahe

gham o ranj mein 'akbar' agar hai ghira to samajh le ki ranj ko bhi hai fana

kisi shai ko nahin hai jahan mein baqa wo ziyaada malul o hazin na rahe