wo hazar hum pe jafa sahi koi shikwa phir bhi rawa nahin

vo hazār ham pe jafā sahī koī shikva phir bhī ravā nahīñ

ki jafā to un kī ḳhatā nahīñ jinheñ koī qadr-e-vafā nahīñ

mirī bad-zanī pe ye ranjisheñ to kisī bhī taur bajā nahīñ

ki jahān-e-ishq meñ bad-zanī to huzūr jurm-o-ḳhatā nahīñ

mire ishq ko tirī be-ruḳhī hī nasīb hai to yahī sahī

tirī be-ruḳhī rahe shādmāñ mujhe be-ruḳhī kā gilā nahīñ

ye ġhalat ki mahfil-e-nāz meñ koī āshnā-e-nazar na thā

koī tum se kah to rahā thā kuchh magar aah tum ne sunā nahīñ

unheñ aur ilm-e-rah-e-vafā ye yaqīñ bhī aa.e to kis tarah

ki unhī ke dāman-e-nāz par kahīñ ḳhāk-e-rāh-e-vafā nahīñ

mire ai dil-e-alam-āshnā kisī vahm meñ na ho mubtalā

tujhe rakh sakeñge vo yaad kyā kabhī jin kā dil hī dukhā nahīñ

ye mah-e-do-hafta kī chāñdnī meñ dil-e-shikasta kī hasrateñ

kabhī mere dil hī se pūchh lo jo tumhāre dil ko patā nahīñ

ye kamāl-e-jazba-o-sar nahīñ tire sañg-e-dar hī kī baat hai

tire ek dar pe jo jhuk gayā vo hazār dar pe jhukā nahīñ

unheñ yuuñ na dar se haTā.iye unheñ kuchh to de ke hī Tāliye

ki vahī ġharīb-e-dayār haiñ vo ġharīb jin kā ḳhudā nahīñ

wo hazar hum pe jafa sahi koi shikwa phir bhi rawa nahin

ki jafa to un ki KHata nahin jinhen koi qadr-e-wafa nahin

meri bad-zani pe ye ranjishen to kisi bhi taur baja nahin

ki jahan-e-ishq mein bad-zani to huzur jurm-o-KHata nahin

mere ishq ko teri be-ruKHi hi nasib hai to yahi sahi

teri be-ruKHi rahe shadman mujhe be-ruKHi ka gila nahin

ye ghalat ki mahfil-e-naz mein koi aashna-e-nazar na tha

koi tum se kah to raha tha kuchh magar aah tum ne suna nahin

unhen aur ilm-e-rah-e-wafa ye yaqin bhi aae to kis tarah

ki unhi ke daman-e-naz par kahin KHak-e-rah-e-wafa nahin

mere ai dil-e-alam-ashna kisi wahm mein na ho mubtala

tujhe rakh sakenge wo yaad kya kabhi jin ka dil hi dukha nahin

ye mah-e-do-hafta ki chandni mein dil-e-shikasta ki hasraten

kabhi mere dil hi se puchh lo jo tumhaare dil ko pata nahin

ye kamal-e-jazba-o-sar nahin tere sang-e-dar hi ki baat hai

tere ek dar pe jo jhuk gaya wo hazar dar pe jhuka nahin

unhen yun na dar se haTaiye unhen kuchh to de ke hi Taliye

ki wahi gharib-e-dayar hain wo gharib jin ka KHuda nahin