wo husn husn-e-badan kab kisi ko dekhta hai

vo husn husn-e-badan kab kisī ko dekhtā hai

ḳhud apne mā’nī-o-mafhūm hī ko dekhtā hai

guzar rahī hai in āñkhoñ ke sāmne se bahār

Thahar Thahar ke ye dil us galī ko dekhtā hai

ye dil ki asl meñ be-dīd hī kī rū se hai

pukārtā hai kisī ko kisī ko dekhtā hai

nahīñ khulegā kisī tarh husn-e-ārā.ish

tū kis lihāz se is sādgī ko dekhtā hai

'abas hai paañv kī zanjīr dekhnā har sub.h

junūñ-shi’ār kahāñ be-kasī ko dekhtā hai

vo TūTte hue ehsās chhūTte hue log

tū duur hotī huī zindagī ko dekhtā hai

nihāñ thā sab se vo ik phuul jo ki zaḳhm banā

'ayāñ huā to zamāna usī ko dekhtā hai

vo peshtar kisī nā-dīd kī talāsh meñ thā

panāh ke liye ab shā'irī ko dekhtā hai

wo husn husn-e-badan kab kisi ko dekhta hai

KHud apne ma’ni-o-mafhum hi ko dekhta hai

guzar rahi hai in aankhon ke samne se bahaar

Thahar Thahar ke ye dil us gali ko dekhta hai

ye dil ki asl mein be-did hi ki ru se hai

pukarta hai kisi ko kisi ko dekhta hai

nahin khulega kisi tarh husn-e-araish

tu kis lihaz se is sadgi ko dekhta hai

'abas hai panw ki zanjir dekhna har subh

junun-shi’ar kahan be-kasi ko dekhta hai

wo TuTte hue ehsas chhuTte hue log

tu dur hoti hui zindagi ko dekhta hai

nihan tha sab se wo ek phul jo ki zaKHm bana

'ayan hua to zamana usi ko dekhta hai

wo peshtar kisi na-did ki talash mein tha

panah ke liye ab sha'iri ko dekhta hai