wo husn kya jo kisi dil ka muddaa na hua

vo husn kyā jo kisī dil kā mudda.ā na huā

vo ishq kyā jo mohabbat kī intihā na huā

bachegā kyā koī un kī nazar ke tīroñ se

nishāna un kī nazar kā kabhī ḳhatā na huā

koī payām na ham nāma-bar ko de paa.e

salām kahte hī fil-faur vo ravāna huā

hamārā zikr pahuñchte hī un kī mahfil meñ

zamāne bhar kī zabāñ par chaḌhā fasāna huā

ḳhudā ke bande hī bandoñ pe zulm karte haiñ

ḳhudā kā shukr hai banda abhī ḳhudā na huā

tire huzūr pahuñch kar bhī sab rahe mahrūm

kisī ko hausla-e-arz-e-mudda.ā na huā

butoñ kī yaad meñ 'āzam' basar huī apnī

ḳhudā kī yaad kā farz ek din adā na huā

wo husn kya jo kisi dil ka muddaa na hua

wo ishq kya jo mohabbat ki intiha na hua

bachega kya koi un ki nazar ke tiron se

nishana un ki nazar ka kabhi KHata na hua

koi payam na hum nama-bar ko de pae

salam kahte hi fil-faur wo rawana hua

hamara zikr pahunchte hi un ki mahfil mein

zamane bhar ki zaban par chaDha fasana hua

KHuda ke bande hi bandon pe zulm karte hain

KHuda ka shukr hai banda abhi KHuda na hua

tere huzur pahunch kar bhi sab rahe mahrum

kisi ko hausla-e-arz-e-muddaa na hua

buton ki yaad mein 'azam' basar hui apni

KHuda ki yaad ka farz ek din ada na hua