wo ek fasana karungi zahir jo baat dil mein dabi hui hai

vo ik fasāna karūñgī zāhir jo baat dil meñ dabī huī hai

qadam zamīñ par nahīñ haiñ mere mujhe mohabbat milī huī hai

sunā hai jab se vo aa rahe haiñ falak hai dāman bichhā.e baiThā

fazā bhī jaise mahak rahī hai havā bhī kuchh kuchh thamī huī hai

ḳhudā gavāh hai ki husn aisā kahīñ bhī hogā na is jahāñ meñ

mire muqābil hue haiñ jab se nazar unhīñ par jamī huī hai

jo un ko dekhā to raaz jaanā hai chāñd raushan unhīñ ke dam se

miTe haiñ shab ke sabhī añdhere ki raushnī bhī tabhī huī hai

us ek pal jab kahā thā us ne maiñ jā rahā huuñ vatan ko apne

Thahar gayā hai ye vaqt tab se zamīñ kī gardish rukī huī hai

vo aise shāmil huā hai mujh meñ ki miT gayā hai vajūd merā

fanā bhī us meñ baqā bhī us meñ usī meñ 'kausar' basī huī hai

wo ek fasana karungi zahir jo baat dil mein dabi hui hai

qadam zamin par nahin hain mere mujhe mohabbat mili hui hai

suna hai jab se wo aa rahe hain falak hai daman bichhae baiTha

faza bhi jaise mahak rahi hai hawa bhi kuchh kuchh thami hui hai

KHuda gawah hai ki husn aisa kahin bhi hoga na is jahan mein

mere muqabil hue hain jab se nazar unhin par jami hui hai

jo un ko dekha to raaz jaana hai chand raushan unhin ke dam se

miTe hain shab ke sabhi andhere ki raushni bhi tabhi hui hai

us ek pal jab kaha tha us ne main ja raha hun watan ko apne

Thahar gaya hai ye waqt tab se zamin ki gardish ruki hui hai

wo aise shamil hua hai mujh mein ki miT gaya hai wajud mera

fana bhi us mein baqa bhi us mein usi mein 'kausar' basi hui hai