wo ek jhalak wo mauj mujh mein aa ke sab baha gai

vo ik jhalak vo mauj mujh meñ aa ke sab bahā ga.ī

daraḳht jaane kyā hue nadī kahāñ samā ga.ī

jahāñ meñ ye ajab nahīñ diyā jale havā chale

bas is pe ġhaur kījiye diyā bujhā havā ga.ī

mire chalā.e tiir jaane kaise mujh ko aa lage

mirī uḌaa.ī ḳhaak mujh ko ḳhaak meñ milā ga.ī

fareb-e-ishq meñ jo thī badan ko ik badan kī bhuuk

ye bhuuk itnī baḌh ga.ī ki phir mujhe hī khā ga.ī

tirā ḳhayāl phuul hai ki tujh ko sochte hue

koī mahak kahīñ se aa ke chāroñ or chhā ga.ī

mirā safar qiyām māñgtā hai mere ham-safar

tū apnī soch aage baḌh mirī sarā.e aa ga.ī

wo ek jhalak wo mauj mujh mein aa ke sab baha gai

daraKHt jaane kya hue nadi kahan sama gai

jahan mein ye ajab nahin diya jale hawa chale

bas is pe ghaur kijiye diya bujha hawa gai

mere chalae tir jaane kaise mujh ko aa lage

meri uDai KHak mujh ko KHak mein mila gai

fareb-e-ishq mein jo thi badan ko ek badan ki bhuk

ye bhuk itni baDh gai ki phir mujhe hi kha gai

tera KHayal phul hai ki tujh ko sochte hue

koi mahak kahin se aa ke chaaron or chha gai

mera safar qiyam mangta hai mere ham-safar

tu apni soch aage baDh meri sarae aa gai