وہ اک جھلک وہ موج مجھ میں آ کے سب بہا گئی

وہ اک جھلک وہ موج مجھ میں آ کے سب بہا گئی

درخت جانے کیا ہوئے ندی کہاں سما گئی

جہاں میں یہ عجب نہیں دیا جلے ہوا چلے

بس اس پے غور کیجئے دیا بجھا ہوا گئی

مرے چلائے تیر جانے کیسے مجھ کو آ لگے

مری اڑائی خاک مجھ کو خاک میں ملا گئی

فریب عشق میں جو تھی بدن کو اک بدن کی بھوک

یہ بھوک اتنی بڑھ گئی کہ پھر مجھے ہی کھا گئی

ترا خیال پھول ہے کہ تجھ کو سوچتے ہوئے

کوئی مہک کہیں سے آ کے چاروں اور چھا گئی

مرا سفر قیام مانگتا ہے میرے ہم سفر

تو اپنی سوچ آگے بڑھ مری سرائے آ گئی