wo ek nigah jo be-iKHtiyar karti hai

vo ik nigāh jo be-iḳhtiyār kartī hai

diloñ ko dard kā ummīd-vār kartī hai

vahī sulūk mire dil se tum bhī kyoñ na karo

chaman ke saath jo fasl-e-bahār kartī hai

nigāh-e-shauq ko duuñ kaun-sī sazā yā-rab

ye dil kā rāz-e-nihāñ āshkār kartī hai

samajh sakā na koī fitrat-e-mohabbat ko

ye us ko phūñktī hai jis ko pyaar kartī hai

mujhe to chain nahīñ hai kashākash-e-ġham se

vo shai hai kyā jo tumheñ be-qarār kartī hai

na aa.e tum to shikāyat mujhe nahīñ lekin

ye chāñdnī jo mujhe sharmsār kartī hai

ġhurūr-e-ishq bahut ho chukā 'adīb' bahut

vo bazm ab bhī tirā intizār kartī hai

wo ek nigah jo be-iKHtiyar karti hai

dilon ko dard ka ummid-war karti hai

wahi suluk mere dil se tum bhi kyon na karo

chaman ke sath jo fasl-e-bahaar karti hai

nigah-e-shauq ko dun kaun-si saza ya-rab

ye dil ka raaz-e-nihan aashkar karti hai

samajh saka na koi fitrat-e-mohabbat ko

ye us ko phunkti hai jis ko pyar karti hai

mujhe to chain nahin hai kashakash-e-gham se

wo shai hai kya jo tumhein be-qarar karti hai

na aae tum to shikayat mujhe nahin lekin

ye chandni jo mujhe sharmsar karti hai

ghurur-e-ishq bahut ho chuka 'adib' bahut

wo bazm ab bhi tera intizar karti hai