wo imtihan mein jab hum ko Dal deta hai

vo imtihān meñ jab ham ko Daal detā hai

jo lā-javāb hoñ aise savāl detā hai

vo merī fikr taġhazzul meñ Dhaal detā hai

mirā ḳhudā mujhe nāzuk-ḳhayāl detā hai

utārtā hai mire zehn par na.e ash.ār

dhanak ke rang ġhazal meñ vo Daal detā hai

ye panchhiyoñ ke jo naġhme sunā.ī dete haiñ

koī to detā hai sur in ko taal detā hai

panāh detā hai yuuñ panchhiyoñ ko āñchal meñ

daraḳht dhuup ko saa.e meñ Dhaal detā hai

vo jis kī den haiñ sāñseñ agar vo chāhe to

bashar ko maut ke muñh se nikāl detā hai

nasīb qaid hai sab kā usī kī muTThī meñ

vahī bashar ko urūj-o-zavāl detā hai

vahī diloñ pe lagātā hai zaḳhm aur vahī

diloñ ko zabt ke sāñche meñ Dhaal detā hai

ḳhudā kā shukr karo dilbaro ki jo tum ko

vaqār detā hai husn-o-jamāl detā hai

karūñ maiñ us kī malāmat nahīñ mirī tahzīb

jo 'nāzlī' mujhe pal pal malāl detā hai

wo imtihan mein jab hum ko Dal deta hai

jo la-jawab hon aise sawal deta hai

wo meri fikr taghazzul mein Dhaal deta hai

mera KHuda mujhe nazuk-KHayal deta hai

utarta hai mere zehn par nae ashaar

dhanak ke rang ghazal mein wo Dal deta hai

ye panchhiyon ke jo naghme sunai dete hain

koi to deta hai sur in ko tal deta hai

panah deta hai yun panchhiyon ko aanchal mein

daraKHt dhup ko sae mein Dhaal deta hai

wo jis ki den hain sansen agar wo chahe to

bashar ko maut ke munh se nikal deta hai

nasib qaid hai sab ka usi ki muTThi mein

wahi bashar ko uruj-o-zawal deta hai

wahi dilon pe lagata hai zaKHm aur wahi

dilon ko zabt ke sanche mein Dhaal deta hai

KHuda ka shukr karo dilbaro ki jo tum ko

waqar deta hai husn-o-jamal deta hai

karun main us ki malamat nahin meri tahzib

jo 'nazli' mujhe pal pal malal deta hai