wo is ada se wahan ja ke sharmsar aaya

vo is adā se vahāñ jā ke sharmsār aaya

raqīb par mujhe be-iḳhtiyār pyaar aaya

ye haal thā shab-e-va.ada ki tā-ba-rāhguzar

hazār baar gayā maiñ hazār baar aaya

tirā hī kūcha Thikāna hai ḳhāksāroñ kā

jo zinda aa na sakā maiñ mirā ġhubār aaya

maze uḌaa.e vahāñ ḳhush rahā liyā in.aam

yahāñ jo nāma-bar aaya to ashk-bār aaya

guzar ga.e isī gardish meñ apne lail-o-nahār

shab-e-firāq ga.ī roz-e-intizār aaya

uḌaa.e haiñ malak-ul-maut ne bhī tere Dhang

hazār baar bulāyā to ek baar aaya

ḳhudā ke vāste jhūTī na khā.iye qasmeñ

mujhe yaqīn huā mujh ko e.atibār aaya

kahāñ the shab ko tumheñ kuchh ḳhabar bhī hai ki nahīñ

koī pukārne vaalā bahut pukār aaya

kamāl-e-ishq ko farhād-o-qais kab pahuñche

vo puḳhta-kār hai dil jis kā baar baar aaya

vo kyoñ hue mire mushtāq ḳhair ho yā-rab

talab meñ kal hī ḳhat aaya thā aaj taar aaya

pilā de aaj sar-e-shām mujh ko ai saaqī

ki terī bazm meñ ik maiñ hī roza-dār aaya

Dare jo hashr meñ vo mujh ko dekhte hī kahā

mirā rafīq mirā 'dāġh'-e-jāñ-nisār aaya

wo is ada se wahan ja ke sharmsar aaya

raqib par mujhe be-iKHtiyar pyar aaya

ye haal tha shab-e-wada ki ta-ba-rahguzar

hazar bar gaya main hazar bar aaya

tera hi kucha Thikana hai KHaksaron ka

jo zinda aa na saka main mera ghubar aaya

maze uDae wahan KHush raha liya inam

yahan jo nama-bar aaya to ashk-bar aaya

guzar gae isi gardish mein apne lail-o-nahaar

shab-e-firaq gai roz-e-intizar aaya

uDae hain malak-ul-maut ne bhi tere Dhang

hazar bar bulaya to ek bar aaya

KHuda ke waste jhuTi na khaiye qasmen

mujhe yaqin hua mujh ko eatibar aaya

kahan the shab ko tumhein kuchh KHabar bhi hai ki nahin

koi pukarne wala bahut pukar aaya

kamal-e-ishq ko farhad-o-qais kab pahunche

wo puKHta-kar hai dil jis ka bar bar aaya

wo kyon hue mere mushtaq KHair ho ya-rab

talab mein kal hi KHat aaya tha aaj tar aaya

pila de aaj sar-e-sham mujh ko ai saqi

ki teri bazm mein ek main hi roza-dar aaya

Dare jo hashr mein wo mujh ko dekhte hi kaha

mera rafiq mera 'dagh'-e-jaan-nisar aaya