wo is andaz ki mujhse mohabbat chahta hai

vo is andāz kī mujh se mohabbat chāhtā hai

mire har ḳhvāb par apnī hukūmat chāhtā hai

mire har lafz meñ jo boltā hai mujh se baḌh kar

mire har lafz kī mujh se vazāhat chāhtā hai

bahāna chāhiye us ko bhī ab tark-e-vafā kā

maiñ ḳhud us se karūñ koī shikāyat chāhtā hai

use ma.alūm hai mere paroñ meñ dam nahīñ hai

mirā sayyād ab mujh se baġhāvat chāhtā hai

vo kahtā hai ki maiñ us kī zarūrat ban chukī huuñ

to goyā vo mujhe hasb-e-zarūrat chāhtā hai

kabhī us ke savāloñ se mujhe lagtā hai aise

ki jaise vo ḳhudā hai aur qayāmat chāhtā hai

use ma.alūm hai maiñ ne hamesha sach likhā hai

vo phir bhī jhuuT kī mujh se himāyat chāhtā hai

wo is andaz ki mujh se mohabbat chahta hai

mere har KHwab par apni hukumat chahta hai

mere har lafz mein jo bolta hai mujh se baDh kar

mere har lafz ki mujh se wazahat chahta hai

bahana chahiye us ko bhi ab tark-e-wafa ka

main KHud us se karun koi shikayat chahta hai

use malum hai mere paron mein dam nahin hai

mera sayyaad ab mujh se baghawat chahta hai

wo kahta hai ki main us ki zarurat ban chuki hun

to goya wo mujhe hasb-e-zarurat chahta hai

kabhi us ke sawalon se mujhe lagta hai aise

ki jaise wo KHuda hai aur qayamat chahta hai

use malum hai main ne hamesha sach likha hai

wo phir bhi jhuT ki mujh se himayat chahta hai