wo is tarah se meri anjuman mein lauT aae

vo is tarah se mirī anjuman meñ lauT aa.e

bhaTak ke jaise parinda vatan meñ lauT aa.e

guzar ga.ī thī koī titlī mujh ko chhūte hue

tamām rang mire pairahan meñ lauT aa.e

do-chār din meñ hī thak ga.e the dasht-e-rūh meñ ham

so ek din usī shahr-e-badan meñ lauT aa.e

hamāre jism meñ Dhalne lagī thī ḳhāmoshī

bhalā huā ki parinde chaman meñ lauT aa.e

jab aayā yaar to thoḌā sā uTh ke baiTh ga.e

yuuñ mil ke yaar se bazm-e-suḳhan meñ lauT aa.e

bas ek dard ne kyā piiTh thapthapā.ī ki phir

tamām husn-o-jamāl ahl-e-fan meñ lauT aa.e

sunā hai phir se mohabbat meñ log marne lage

ye kis zamāne ke sikke chalan meñ lauT aa.e

huī jo shaam to phir raat kāTne ke liye

tamām log mire tan-badan meñ lauT aa.e

wo is tarah se meri anjuman mein lauT aae

bhaTak ke jaise parinda watan mein lauT aae

guzar gai thi koi titli mujh ko chhute hue

tamam rang mere pairahan mein lauT aae

do-chaar din mein hi thak gae the dasht-e-ruh mein hum

so ek din usi shahr-e-badan mein lauT aae

hamare jism mein Dhalne lagi thi KHamoshi

bhala hua ki parinde chaman mein lauT aae

jab aaya yar to thoDa sa uTh ke baiTh gae

yun mil ke yar se bazm-e-suKHan mein lauT aae

bas ek dard ne kya piTh thapthapai ki phir

tamam husn-o-jamal ahl-e-fan mein lauT aae

suna hai phir se mohabbat mein log marne lage

ye kis zamane ke sikke chalan mein lauT aae

hui jo sham to phir raat kaTne ke liye

tamam log mere tan-badan mein lauT aae