wo jafa-kash hain ki Darte nahin aazar se hum

vo jafā-kash haiñ ki Darte nahīñ āzār se ham

dil lagā baiThe haiñ ek shoḳh jafākār se ham

tū gayā ghar meñ mujhe chhoḌ ke tanhā jab se

sar paTakte haiñ sitamgar dar-o-dīvār se ham

umr guzrī ki ġham-e-hijr meñ dil hai betāb

dekhiye shaad hoñ kab yaar ke dīdār se ham

niiñd aa.e to kabhī ḳhvāb meñ dekheñ tujh ko

tang aa.e haiñ bahut dīda-e-bedār se ham

qahr hai dam-ba-dam abrū kā chaḌhānā terā

ai sitamgar nahīñ Darte tirī talvār se ham

ho ga.ī un kī ināyat se har ek mushkil hal

aas rakhte haiñ yahī haidar-e-karrār se ham

hai yahī apnī shaqāvat kā vasīla 'be-gun'

ishq rakhte haiñ dilā ahmad-e-muḳhtār se ham

wo jafa-kash hain ki Darte nahin aazar se hum

dil laga baiThe hain ek shoKH jafakar se hum

tu gaya ghar mein mujhe chhoD ke tanha jab se

sar paTakte hain sitamgar dar-o-diwar se hum

umr guzri ki gham-e-hijr mein dil hai betab

dekhiye shad hon kab yar ke didar se hum

nind aae to kabhi KHwab mein dekhen tujh ko

tang aae hain bahut dida-e-bedar se hum

qahr hai dam-ba-dam abru ka chaDhana tera

ai sitamgar nahin Darte teri talwar se hum

ho gai un ki inayat se har ek mushkil hal

aas rakhte hain yahi haidar-e-karrar se hum

hai yahi apni shaqawat ka wasila 'be-gun'

ishq rakhte hain dila ahmad-e-muKHtar se hum