wo jahan bhi kaisa jahan tha jahan raat meri guzar gai

vo jahāñ bhī kaisā jahān thā jahāñ raat merī guzar ga.ī

vo havā-e-shauq thī mushk-bū rag-e-jāñ ko jaise katar ga.ī

shab-e-tār jo ki thī ham-safar kisī rāste meñ basar huī

ho bayān-e-vahshat-e-dil bhī kyā jo guzar ga.ī so guzar ga.ī

jahāñ dhaḌkanoñ kā hisāb thā vahīñ kaan us pe lage hue

na kisī ko phir bhī ḳhabar huī na kisī kī us pe nazar ga.ī

ye jo lā-makāñ hai makāñ to hai to makīñ bhī honā zarūr hai

vo usī kā hukm thā bil-yaqīñ jo zamīñ pe nau-e-bashar ga.ī

koī rashk-e-husn-e-tamām thā vahī qadd-o-qāmat-e-sarv sā

vahī barq jis kā bayāñ ho kyā jo girī to dil meñ utar ga.ī

vo duā thī mere shikasta dil kī jo sidra par bhī na ruk sakī

rah-e-arsh us kī nazar meñ thī na idhar ga.ī na udhar ga.ī

wo jahan bhi kaisa jahan tha jahan raat meri guzar gai

wo hawa-e-shauq thi mushk-bu rag-e-jaan ko jaise katar gai

shab-e-tar jo ki thi ham-safar kisi raste mein basar hui

ho bayan-e-wahshat-e-dil bhi kya jo guzar gai so guzar gai

jahan dhaDkanon ka hisab tha wahin kan us pe lage hue

na kisi ko phir bhi KHabar hui na kisi ki us pe nazar gai

ye jo la-makan hai makan to hai to makin bhi hona zarur hai

wo usi ka hukm tha bil-yaqin jo zamin pe nau-e-bashar gai

koi rashk-e-husn-e-tamam tha wahi qadd-o-qamat-e-sarw sa

wahi barq jis ka bayan ho kya jo giri to dil mein utar gai

wo dua thi mere shikasta dil ki jo sidra par bhi na ruk saki

rah-e-arsh us ki nazar mein thi na idhar gai na udhar gai