wo jald-baz aise achanak juda hua

vo jald-bāz aise achānak judā huā

maiñ soch bhī na paayā mire saath kyā huā

mujh se bahut hī duur koī jā chukā hai aur

dil hai ki phir umiid koī bāñdhtā huā

merī chaTān zabt se TūTegī dekhnā

mujh meñ hai us kī yaad kā dariyā rukā huā

ronā na dekh merā tasallī na de mujhe

ye pūchh mujh se kitnā baḌā hādisa huā

sab aa chuke haiñ jānñe vaale sab aa chuke

marte hue se jhuuT koī boltā huā

ik aa.ine kī gard mire muñh pe aa paḌī

muddat ke baa'd mujh se mirā rābta huā

mauj-e-ġhubār aa.ī uḌā le ga.ī use

jaatā bhī kitnī duur musāfir thakā huā

wo jald-baz aise achanak juda hua

main soch bhi na paya mere sath kya hua

mujh se bahut hi dur koi ja chuka hai aur

dil hai ki phir umid koi bandhta hua

meri chaTan zabt se TuTegi dekhna

mujh mein hai us ki yaad ka dariya ruka hua

rona na dekh mera tasalli na de mujhe

ye puchh mujh se kitna baDa hadisa hua

sab aa chuke hain jaanne wale sab aa chuke

marte hue se jhuT koi bolta hua

ek aaine ki gard mere munh pe aa paDi

muddat ke ba'd mujh se mera rabta hua

mauj-e-ghubar aai uDa le gai use

jata bhi kitni dur musafir thaka hua