وہ جلدباز ایسے اچانک جدا ہوا

وہ جلدباز ایسے اچانک جدا ہوا

میں سوچ بھی نہ پایا مرے ساتھ کیا ہوا

مجھ سے بہت ہی دور کوئی جا چکا ہے اور

دل ہے کہ پھر امید کوئی باندھتا ہوا

میری چٹان ضبط سے ٹوٹے گی دیکھنا

مجھ میں ہے اس کی یاد کا دریا رکا ہوا

رونا نہ دیکھ میرا تسلی نہ دے مجھے

یہ پوچھ مجھ سے کتنا بڑا حادثہ ہوا

سب آ چکے ہیں جاننے والے سب آ چکے

مرتے ہوئے سے جھوٹ کوئی بولتا ہوا

اک آئنے کی گرد مرے منہ پہ آ پڑی

مدت کے بعد مجھ سے مرا رابطہ ہوا

موج غبار آئی اڑا لے گئی اسے

جاتا بھی کتنی دور مسافر تھکا ہوا