wo jalwe jo hijab-e-naz se mahfil mein aate hain

vo jalve jo hijāb-e-nāz se mahfil meñ aate haiñ

mire dil se nikalte haiñ ki mere dil meñ aate haiñ

fanā pahlā adab hai shart-e-avval bazm-e-jānāñ meñ

jo apne aap se guzreñ vo is mahfil meñ aate haiñ

khulī āñkhoñ se 'ālam par gumān-e-'ālam-e-dil hai

jab āñkheñ band kartā huuñ nazar vo dil meñ aate haiñ

koī sāda-dilī-e-shauq ko ye baat samjhā de

payām-e-husn hote haiñ jo armāñ dil meñ aate haiñ

ḳhudī ke jauhar āsānī meñ insāñ par nahīñ khulte

ham apne sāmne khul kar faqat mushkil meñ aate haiñ

'zahīn' allāh ko maiñ dekhtā huuñ husn-e-jānāñ meñ

nazar ḳhurshīd ke jalve mah-e-kāmil meñ aate haiñ

wo jalwe jo hijab-e-naz se mahfil mein aate hain

mere dil se nikalte hain ki mere dil mein aate hain

fana pahla adab hai shart-e-awwal bazm-e-jaanan mein

jo apne aap se guzren wo is mahfil mein aate hain

khuli aankhon se 'alam par guman-e-'alam-e-dil hai

jab aankhen band karta hun nazar wo dil mein aate hain

koi sada-dili-e-shauq ko ye baat samjha de

payam-e-husn hote hain jo arman dil mein aate hain

KHudi ke jauhar aasani mein insan par nahin khulte

hum apne samne khul kar faqat mushkil mein aate hain

'zahin' allah ko main dekhta hun husn-e-jaanan mein

nazar KHurshid ke jalwe mah-e-kaamil mein aate hain