وہ جوانی نہ رہی اب وہ زمانے نہ رہے

وہ جوانی نہ رہی اب وہ زمانے نہ رہے

عہد ہنگام محبت کے فسانے نہ رہے

قدر ہستی تھی مجھے بہر عنایات بتاں

وہ جو جینے کے بہانے تھے بہانے نہ رہے

ساز بربط کی نوا ہے نہ وہ آواز طرب

گنگناتے تھے جنہیں اب وہ ترانے نہ رہے

وہ جو بیٹھے تھے گھڑی بھر کو مری محفل میں

تھے جو دو چار مرے یار و یگانے نہ رہے

جذبۂ شوق سفر اپنی جگہ ہے لیکن

نہ سفینہ رہا کوئی وہ ٹھکانے نہ رہے

خوشۂ عمر سے گرتے رہے ساعات گراں

خوشۂ عمر میں اب وقت کے دانے نہ رہے

کوئی کہتا تھا تعارف میں مری تربت پر

کوچۂ عشق کے سیدؔ وہ دوانے نہ رہے