wo jawani na rahi ab wo zamane na rahe

vo javānī na rahī ab vo zamāne na rahe

ahd-e-hangām-e-mohabbat ke fasāne na rahe

qadr-e-hastī thī mujhe bahr-e-ināyāt-e-butāñ

vo jo jiine ke bahāne the bahāne na rahe

sāz-e-barbat kī navā hai na vo āvāz-e-tarab

gungunāte the jinheñ ab vo tarāne na rahe

vo jo baiThe the ghaḌī bhar ko mirī mahfil meñ

the jo do chaar mire yār-o-yagāne na rahe

jazba-e-shauq-e-safar apnī jagah hai lekin

na safīna rahā koī vo Thikāne na rahe

ḳhosha-e-umr se girte rahe sā.āt-e-girāñ

ḳhosha-e-umr meñ ab vaqt ke daane na rahe

koī kahtā thā ta.āruf meñ mirī turbat par

kūcha-e-ishq ke 'sayyad' vo divāne na rahe

wo jawani na rahi ab wo zamane na rahe

ahd-e-hangam-e-mohabbat ke fasane na rahe

qadr-e-hasti thi mujhe bahr-e-inayat-e-butan

wo jo jine ke bahane the bahane na rahe

saz-e-barbat ki nawa hai na wo aawaz-e-tarab

gungunate the jinhen ab wo tarane na rahe

wo jo baiThe the ghaDi bhar ko meri mahfil mein

the jo do chaar mere yar-o-yagane na rahe

jazba-e-shauq-e-safar apni jagah hai lekin

na safina raha koi wo Thikane na rahe

KHosha-e-umr se girte rahe saat-e-giran

KHosha-e-umr mein ab waqt ke dane na rahe

koi kahta tha taaruf mein meri turbat par

kucha-e-ishq ke 'sayyad' wo diwane na rahe