wo jin ke aangan mohabbaton se bhare hue the

vo jin ke āñgan mohabbatoñ se bhare hue the

unhī makānoñ meñ khel kar ham baḌe hue the

havā ke jhoñke se aabjū meñ gire the shāyad

vo phuul dil kī chaTān par jo dhare hue the

zamīñ ne karvaT badal ke dekhā shajar kī jānib

laraztī shāḳhoñ meñ kuchh parinde Dare hue the

udaas peḌoñ pe ik tilismī sahīfa utrā

ḳhizāñ ke mausam meñ zard patte hare hue the

purāne sāhil pe zindagī pur-sukūñ thī lekin

na.e jazīroñ pe kuchh na.e tajrabe hue the

kabhī na lauTe ḳhizāñ-rasīda gharoñ ko 'rāshid'

jo sabz jhīloñ kī sair karne ga.e hue the

wo jin ke aangan mohabbaton se bhare hue the

unhi makanon mein khel kar hum baDe hue the

hawa ke jhonke se aabju mein gire the shayad

wo phul dil ki chaTan par jo dhare hue the

zamin ne karwaT badal ke dekha shajar ki jaanib

larazti shaKHon mein kuchh parinde Dare hue the

udas peDon pe ek tilismi sahifa utra

KHizan ke mausam mein zard patte hare hue the

purane sahil pe zindagi pur-sukun thi lekin

nae jaziron pe kuchh nae tajrabe hue the

kabhi na lauTe KHizan-rasida gharon ko 'rashid'

jo sabz jhilon ki sair karne gae hue the