وہ جن کے گنبد و مینار کے ہم سر نہیں ہوتے

وہ جن کے گنبد و مینار کے ہم سر نہیں ہوتے

انہیں کی قبر پر تعویذ کے پتھر نہیں ہوتے

شناور کو سدا اس بات کا اندازہ ہوتا ہے

ہو اتھلا سا جہاں پانی وہاں گوہر نہیں ہوتے

ہمیں پامال راہوں سے الگ چلنے کی عادت ہے

جہاں سب ڈھونڈتے ہیں ہم وہاں اکثر نہیں ہوتے

پرندوں کی نہیں مشکل وہ واپس لوٹ جاتے ہیں

ذرا ان کی تو سوچو جن کے اپنے گھر نہیں ہوتے

شہادت میں ہے سرداری کا منصب جان سے بڑھ کر

ہتھیلی پر نہ رکھے ہوں تو پھر وہ سر نہیں ہوتے