wo jis ke nam mein lazzat bahut hai

vo jis ke naam meñ lazzat bahut hai

usī ke zikr se barakat bahut hai

zarā mahfūz rastoñ se guzarnā

tumhārī shahr meñ shohrat bahut hai

abhī sūraj ne lab khole nahīñ haiñ

abhī se dhuup meñ shiddat bahut hai

mujhe sone kī qīmat mat batāo

maiñ miTTī huuñ mirī azmat bahut hai

kisī kī yaad meñ kho.e raheñge

gunah-gāroñ ko ye jannat bahut hai

jinheñ masrūf rahne kā maraz thā

unheñ bhī āj-kal fursat bahut hai

jahāñ par ḳhushbueñ thiiñ zindagī kī

usī mahfil meñ ab ġhībat bahut hai

kabhī to husn kā sadqa nikālo

tumhāre paas ye daulat bahut hai

ġhazal ḳhud kah ke paḌhnā chāhte ho

miyāñ is kaam meñ mehnat bahut hai

havā to tham chukī lekin diyoñ ke

ravayyoñ meñ abhī dahshat bahut hai

wo jis ke nam mein lazzat bahut hai

usi ke zikr se barakat bahut hai

zara mahfuz raston se guzarna

tumhaari shahr mein shohrat bahut hai

abhi suraj ne lab khole nahin hain

abhi se dhup mein shiddat bahut hai

mujhe sone ki qimat mat batao

main miTTi hun meri azmat bahut hai

kisi ki yaad mein khoe rahenge

gunah-garon ko ye jannat bahut hai

jinhen masruf rahne ka maraz tha

unhen bhi aaj-kal fursat bahut hai

jahan par KHushbuen thin zindagi ki

usi mahfil mein ab ghibat bahut hai

kabhi to husn ka sadqa nikalo

tumhaare pas ye daulat bahut hai

ghazal KHud kah ke paDhna chahte ho

miyan is kaam mein mehnat bahut hai

hawa to tham chuki lekin diyon ke

rawayyon mein abhi dahshat bahut hai