wo jis kitab mein chahat ka silsila nikla

vo jis kitāb meñ chāhat kā silsila niklā

varaq usī meñ ek aañsū bharā huā niklā

talāsh maiñ ne kiyā thā sukūn-e-dil ke liye

magar ye kār-e-mohabbat baḌā judā niklā

ḳhushī to aa.ī thī mehmān kī tarah lekin

ġhamoñ ke saath hamesha kā rābta niklā

vo duur thā to ye lagtā thā hai bahut nazdīk

magar qarīb se dekhā to fāsla niklā

batā rahā thā jo phūloñ kā rāsta mujh ko

usī ke paañv meñ kāñTā chubhā huā niklā

hazāroñ dard tabīboñ ne Thiik kar Daale

magar ye dard-e-mohabbat hī lā-davā niklā

ujāle dekh ke hairān haiñ merī qismat

jo mere ghar se añdheroñ kā qāfila niklā

chale ga.e bhī to kyā qahqahoñ kī mahfil meñ

mizāj apnā vahāñ bhī bujhā huā niklā

vo jī rahā hai zamāne meñ shaan se 'hānī'

vo jis ke nafs kā dāman jalā huā niklā

wo jis kitab mein chahat ka silsila nikla

waraq usi mein ek aansu bhara hua nikla

talash main ne kiya tha sukun-e-dil ke liye

magar ye kar-e-mohabbat baDa juda nikla

KHushi to aai thi mehman ki tarah lekin

ghamon ke sath hamesha ka rabta nikla

wo dur tha to ye lagta tha hai bahut nazdik

magar qarib se dekha to fasla nikla

bata raha tha jo phulon ka rasta mujh ko

usi ke panw mein kanTa chubha hua nikla

hazaron dard tabibon ne Thik kar Dale

magar ye dard-e-mohabbat hi la-dawa nikla

ujale dekh ke hairan hain meri qismat

jo mere ghar se andheron ka qafila nikla

chale gae bhi to kya qahqahon ki mahfil mein

mizaj apna wahan bhi bujha hua nikla

wo ji raha hai zamane mein shan se 'hani'

wo jis ke nafs ka daman jala hua nikla